Alimlər qocalma prosesini yavaşlatmaq potensialına malik eksperimental dərmanla bağlı ümidverici nəticələr əldə ediblər. İlkin sınaqlar zamanı preparatın bəzi canlıların ömrünü 25 faizə qədər uzatdığı müəyyənləşib.
Moderator.az xəbər verir ki, bu barədə “Daily Mail” nəşri məlumat yayıb.
Tədqiqatçılar 991 adlı preparatın AMPK zülalını birbaşa aktivləşdirdiyini müəyyən ediblər. AMPK hüceyrələrin enerji balansının qorunmasında mühüm rol oynayır və enerji çatışmazlığı zamanı hüceyrələrin uyğunlaşmasına kömək edir.
Alimlər bu zülalı hüceyrənin “yanacaq sensoru” ilə müqayisə edirlər. Enerji ehtiyatları azaldıqda AMPK enerji sərfiyyatını məhdudlaşdırır və hüceyrələrin bərpasına yönəlmiş mexanizmləri aktivləşdirir. Onun fəaliyyəti fiziki məşq və oruc zamanı da artır.
Yeni araşdırmada 991 preparatı maya hüceyrələri, nematodlar və meyvə milçəkləri üzərində sınaqdan keçirilib. Təcrübələr zamanı hər üç model orqanizmdə ömrün uzanması müşahidə olunub. Ən yüksək nəticə isə təxminən 25 faiz təşkil edib.
Tədqiqatçılar hesab edirlər ki, müxtəlif canlılarda əldə edilən nəticələr AMPK-nın qocalma prosesindəki rolunun daha dərindən öyrənilməsi üçün əsas yaradır. Növbəti mərhələdə preparatın siçanlar üzərində sınaqdan keçirilməsi planlaşdırılır.
Bununla belə, mütəxəssislər 991-i hələlik insan ömrünü uzadan dərman kimi qəbul etməyin tez olduğunu bildirirlər. Preparatın insanlarda istifadə olunmasına qədər onun təhlükəsizliyi və effektivliyi ilə bağlı çoxsaylı araşdırmalar aparılmalıdır.
Alimlər qeyd edirlər ki, metformin kimi bəzi dərmanlar da AMPK aktivliyinə təsir göstərir. Lakin həmin təsir dolayı yolla baş verdiyindən nəticələrin qiymətləndirilməsi daha mürəkkəbdir.
Tədqiqat müəlliflərinin fikrincə, yeni nəticələr AMPK-nın birbaşa aktivləşdirilməsinin qocalma prosesini yavaşlatmaq və ömrü uzatmaq baxımından potensial imkanlara malik olduğunu göstərir. Lakin bu yanaşmanın insanlarda effektiv olub-olmayacağı hələ məlum deyil.
