Antarktidanın şaxtalı şəraitində pinqvinlər saatlarla buzun üzərində dayana bilir. Sıfırın altında temperaturda ayaqlarının donmamasının səbəbi isə onların orqanizmində formalaşmış xüsusi istilik mübadiləsi sistemidir.
Moderator.az “Discover Wildlife” nəşrinə istinadla xəbər verir ki, pinqvinlərin ayaqları və üzgəclərində əks cərəyanlı istilik mübadiləsi mexanizmi fəaliyyət göstərir. Bu sistem sayəsində bədəndən gələn isti qan ətraflardan qayıdan soyuq qana istilik ötürür.
Beləliklə, isti qan ayaqlara çatarkən müəyyən qədər soyuyur və bədəndən xaricə istilik itkisi azalır. Eyni zamanda ayaqlardan geri qayıdan qan bədənə daxil olmamışdan əvvəl isinməyə başlayır.
Temperatur daha da aşağı düşdükdə pinqvinlərin ayaqlarına qan axını dəyişir. Orqanizm bununla həm istilik itkisini minimuma endirir, həm də toxumaların soyuqdan zədələnməsinin qarşısını almağa çalışır.
Pinqvinlərin qalın yağ təbəqəsi və su keçirməyən lələkləri də soyuqdan qorunmada mühüm rol oynayır. Bu xüsusiyyətlərin birlikdə işləməsi onlara sərt Antarktika şəraitində yaşamağa imkan verir.
Maraqlıdır ki, bütün pinqvinlər eyni şəraitdə yaşamır. Daha isti bölgələrdə yaşayan növlərin isə artıq istiliyi bədəndən uzaqlaşdırmağa kömək edən fərqli uyğunlaşmaları var.
