Hisə verilmiş paprika xolesterin səviyyəsinə və bağırsaq mikroflorasına müsbət təsir göstərə bilər. Lakin bu nəticələr hələlik heyvanlar üzərində aparılan təcrübəyə əsaslanır.
Moderator.az xəbər verir ki, Food & Function elmi jurnalında dərc olunan araşdırmada bu ədviyyatın qan yağlarına və bağırsaq mikrobiomuna mümkün təsirləri öyrənilib.
Tədqiqatda 16 dişi və 14 erkək olmaqla, ümumilikdə 30 sağlam siçovul iştirak edib. Heyvanlar 30 gün ərzində adi qida ilə yanaşı, 5 faiz hisə verilmiş və ya hisə verilməmiş paprika əlavə edilmiş pəhrizlə qidalandırılıb. Daha sonra onların qan göstəriciləri, metabolik fəaliyyəti, daxili orqanlarının vəziyyəti və bağırsaq mikrobiomu qiymətləndirilib.
Nəticələr göstərib ki, hisə verilmiş paprika ilə qidalanan dişi siçovullarda ümumi xolesterin və aşağı sıxlıqlı lipoproteinlərin (LDL), yəni “pis” xolesterinin səviyyəsi daha aşağı olub. Həmçinin onların bağırsaq mikrobiomunda bakteriya müxtəlifliyinin artdığı müşahidə edilib.
Alimlər hesab edirlər ki, bağırsaq mikroflorasında baş verən dəyişikliklər lipid mübadiləsinə təsir göstərə bilər. Bununla belə, nəticələr paprika növündən və heyvanların cinsindən asılı olaraq fərqlənib.
Araşdırma zamanı hisə verilmiş və adi paprikanın metabolik proseslərə eyni cür təsir göstərmədiyi də müəyyənləşdirilib. Tədqiqatçılar bunu ədviyyatın emalı zamanı kimyəvi tərkibində baş verən dəyişikliklərlə, o cümlədən odun tüstüsünün təsiri ilə əlaqələndirirlər.
Təcrübə müddətində paprikadan istifadə ilə əlaqəli daxili orqan zədələnməsi aşkarlanmayıb. Qan və metabolik göstəricilər də fizioloji normalar daxilində qalıb.
Bununla belə, alimlərin nəticələrini insanlara birbaşa şamil etmək olmaz. Hisə verilmiş paprikanın insanlarda xolesterini azaltdığını təsdiqləmək üçün əlavə klinik tədqiqatlara ehtiyac var. Bu ədviyyat sağlam qidalanmanın bir hissəsi ola bilər, lakin yüksək xolesterinin müalicəsini əvəz etmir.
