Qaraciyər sağlamlığını qorumaq üçün səhər yeməyində seçilən qidalara diqqət yetirmək vacibdir. Bəzi məşhur səhər yeməkləri əlavə şəkər və doymuş yağla zəngin olduğundan qaraciyərdə yağ toplanması riskini artıra bilər.
Moderator.az “EatingWell” nəşrinə istinadən xəbər verir ki, dietoloqlar qaraciyər sağlamlığı üçün məhdudlaşdırılması tövsiyə olunan üç qida qrupunu açıqlayıblar.
1. Şirin xəmir məmulatları
Ponçiklər, şirin bulkalar və hazır xəmir məhsulları əlavə şəkər və doymuş yağla zəngindir, lif baxımından isə kasaddır. Bu qidaların tez-tez istehlakı çəki artımına və qaraciyərdə yağ yığılmasına şərait yarada bilər.
2. Şəkərli içkilər
Şirin qəhvə, şəkərli çay və hazır meyvə içkiləri gündəlik şəkər qəbulunu artırır. Onların müntəzəm istehlakı artıq çəki və qaraciyər xəstəlikləri riski ilə əlaqələndirilir. Buna görə şəkərsiz çay və qəhvəyə üstünlük vermək məsləhətdir.
3. Emal olunmuş ət məhsulları
Bekon, vetçina və kolbasa doymuş yağ və natriumla zəngin ola bilər. Tədqiqatlarda bu məhsulların yüksək istehlakı qaraciyərdə yağ toplanması ilə əlaqələndirilib. Mütəxəssislər onların gündəlik qidalanmada məhdudlaşdırılmasını tövsiyə edirlər.
Qaraciyəri qorumaq üçün nə yeməli?
Dietoloqlar səhər yeməyində yulaf əzməsi, meyvə, qoz-fındıq, yumurta və paxlalı bitkilərə üstünlük verməyi məsləhət görürlər. Kolbasa əvəzinə balıq, şəkərli içkilər əvəzinə isə şəkərsiz çay və qəhvə seçmək faydalı ola bilər.
Mütəxəssislərin fikrincə, sevimli qidalardan tamamilə imtina etmək vacib deyil. Əsas məsələ şəkər və doymuş yağla zəngin məhsulları azaltmaq, balanslı qidalanmaq və sağlam qidaları gündəlik rasiona daxil etməkdir.
