Alma sağlamlıq üçün faydalı meyvə hesab olunsa da, onu yeməyin vaxtı dişlərin vəziyyətinə təsir göstərə bilər. Mütəxəssislər xüsusilə yeməkdən dərhal sonra alma yemək vərdişinə diqqət çəkirlər.
Moderator.az “Focus.de” portalına istinadla xəbər verir ki, stomatologiya üzrə ekspert Markus Felber yeməkdən dərhal sonra alma yeməyin diş minasına mənfi təsir göstərə biləcəyini bildirib.
Böyük Britaniyanın Redinq Universitetində aparılan araşdırmalar almaların qan damarlarının fəaliyyətinə müsbət təsir göstərə və “pis” xolesterinin səviyyəsini azaltmağa kömək edə biləcəyini göstərib. Bu meyvə həmçinin həzmi dəstəkləyir və çəkiyə nəzarət edənlər üçün faydalı seçim sayılır.
Lakin Felberin sözlərinə görə, almanın tərkibindəki turşular diş minasına təsir göstərə bilər. Yeməkdən sonra ağız boşluğundakı turşu balansının bərpası müəyyən vaxt tələb edir. Bu müddətdə turşulu qidalar diş minasını daha həssas vəziyyətə sala bilər.
Mütəxəssis dişləri qorumaq üçün yeməkdən sonra alma və digər turşulu meyvələri yeməzdən əvvəl təxminən 30 dəqiqə gözləməyi tövsiyə edir.
Qeyd edək ki, alma sağlam qidalanmanın faydalı hissəsi olaraq qalır. Əsas məsələ onu düzgün vaxtda yemək və ağız boşluğunun gigiyenasına diqqət yetirməkdir.
